RBI Rules : भारतीय रिझर्व्ह बँकेने (RBI) न्यू इंडिया को-ऑपरेटिव्ह बँकेवर 6 महिन्यांसाठी निर्बंध लावले आहेत. यामुळे ग्राहकांना त्यांच्या खात्यातून पैसे काढता येणार नाहीत. अशा परिस्थितीत तुमचे कोणत्याही बँकेत असणारे पैसे किती सुरक्षित आहेत? जाणून घ्या RBI च्या महत्त्वाच्या नियमांबद्दल.
बँकेत जमा केलेले पैसा किती सुरक्षित?
RBI Bank Money Safety Rules India : आपण नेहमीच बँकेत पैसे ठेवताना सुरक्षिततेचा विचार करतो. परंतु, एखादी बँक बंद झाली किंवा आर्थिक संकटात सापडली तर ग्राहकांना किती रक्कम परत मिळू शकते?
RBI Rule: रिझर्व्ह बँकेच्या नियमानुसार, जर एखादी बँक दिवाळखोरीत गेली किंवा तिच्यावर निर्बंध आले, तर ग्राहकांना ठराविक मर्यादेपर्यंतच पैसे परत मिळू शकतात. बँक लुटली गेली, बँकेने फसवणूक केली किंवा ती बंद पडली, तरी ग्राहकांचे संपूर्ण पैसे सुरक्षित राहतीलच असे नाही.
₹5 लाखांपर्यंतचीच हमी!
डिपॉझिट इन्शुरन्स अँड क्रेडिट गॅरंटी कॉरपोरेशन (DICGC) कायद्याच्या कलम 16(1) नुसार, बँकेत ठेवलेल्या रकमेपैकी फक्त ₹5 लाखांपर्यंतच विमा संरक्षण असते. म्हणजेच, तुमच्या खात्यात ₹10 लाख असले तरी बँक बंद पडल्यास तुम्हाला फक्त ₹5 लाख मिळतील.
वेगवेगळ्या खात्यांमध्ये पैसे ठेवले तरीही नियम तोच!
- बचत खाते, चालू खाते, ठेवी (FD) यावरही ₹5 लाखांचीच मर्यादा लागू होते.
- तुमच्या नावाने एकाहून अधिक खाती असली तरी सर्व खात्यांची मिळून ₹5 लाखांपर्यंतचीच हमी असते.
- जर तुम्ही वेगवेगळ्या बँकांमध्ये खाती उघडली असतील, तर प्रत्येक बँकेसाठी ₹5 लाखांची स्वतंत्र हमी लागू होते.
बँक बंद पडली तर पैसे कधी परत मिळतात?
जर बँक आर्थिक अडचणीत आली तर ग्राहकांचे पैसे परत मिळण्यास काही महिने लागू शकतात. बँकेचे व्यवहार पूर्णपणे थांबल्यानंतर DICGC हे पैसे परत करण्याची प्रक्रिया सुरू करते. मात्र, पूर्ण रक्कम मिळेलच याची खात्री नसते.
तुम्ही काय करू शकता?
- ₹5 लाखांच्या मर्यादेपेक्षा जास्त रक्कम वेगवेगळ्या बँकांमध्ये ठेवा.
- सरकारी बँकांमध्ये ठेवी ठेवण्याला प्राधान्य द्या.
- बँकेच्या आर्थिक स्थितीबद्दल अपडेट राहा आणि आवश्यक त्या ठिकाणी गुंतवणूक करा.
बँकेत पैसे ठेवताना आपण पूर्ण सुरक्षित असल्याचे मानतो. मात्र, बँकेला अडचण आल्यास फक्त ₹5 लाखांपर्यंतच विमा संरक्षण मिळते. त्यामुळे आपल्या आर्थिक सुरक्षिततेसाठी योग्य नियोजन करा.
